Коментаторот на МТВ по победата на фудбалерите: Кога нè оспоруваат: и име, и презиме, и нација,и ген, eве нè во Европа

Македонската фудбалска репрезентација за прв пат во својата историја обезбеди учество на едно големо натпреварување. Предводени од капитенот Горан Пандев, “црвено-жолтите“ вечерва во Тбилиси, во баражот за Европското првенство 2020, ја совладаа Грузија со 1:0.

Коментаторите на Македонската радио телевизија се погрижија фановите пред малите екрани да го почувствуваат амбиентот на празната „Динамо Арена“ и исто како и бурно ја дочекаа победата. Тони Стојановски и Горан Стерјов „полудеа“ по завршувањето на мечот и со емотивна реакција го прославија триумфот.

„Кога нè оспоруваат: и име.. и презиме.. и нација.. и ген… eве нè во Европа! Меѓу сите тие што ги описменивме. Ќе нè дочекаат наредниот јуни, ќе ја поздрават нашата репрезентација. Ќе стојат мирно на нашата химна! Ова е порака од сите: православни христијани, Македонци, Албанци, Турци што играат за оваа репрезентација: Дека нашата држава треба да ја чуваат тие што ja водат – и едните, и другите, и третите и четвртите! Ова е голема победа за Македонија! Ова е победа за радост на душата. Да цитирам зборови од нашата поезија: Сега душата се радува затоа што има зошто душа да е. Оваа Македонија ќе живее! Ќе живее! Ќе живее!“, кажа Стојановски.