Кешишев за убиството на Вања и Панче: Пиштолот бил на Боре

Денеска во Судот сведочеше обвинетиот Влатко Кешишев, во врска со грабнувањата и убиствата на Вања Ѓорчевска и на Панче Жежовски.

Кешишев кажа дека за време на грабнувањето на Панче, не знаел дека е убиен и ставен во дупката, бидејќи тој бил подалеку од настанот.

„Јас бидејќи чекав подолу не знаев дека Панче е убиен и фрлан во дупката. Јас тоа го дознав кога се вративме во партија“, изјави тој.

Ефремов: Дали имате одено во обиколка за грабнувањето на Вања?

Кешишев: „Не јас нема одено, само првиот пат кога колата беше паркирана до скалите веднаш до зградата. Тогаш од сутеренот излезе една жена со кратка коса, таа се сврти само лево и десно и сите не виде. И одма влеговме сите во колата и се вративме во штабот“.

За грабнувањето на малата Вања рече дека дознал дури откако се вратиле во седиштето на партијата, односно дека тој „чувал стража“ да не наиде некој.

Кога стигнавме во Бразда, Палчо ми рече подоле на 20-тина метри да останам, за да внимавам да не дојде некој. Два три пати се завртев да видам што се случува. Првиот пат видов како разговараат, гепекот беше отворен, не знаев што разговараат бидејќи беа подалеку. Кажувам целиот настан како што беше. Чекав таму цело време, а тие стоеа и разговараа. После се завртев пак гледав дека копаа и последниот пат кога се завршев Палчо држеше пиштол. Пак се завртев и ме опомена пак да гледам кон патот да не наиде некој. И после слушнав истрле пукање, ама некако тапо, туп беше… На крајот ме викна да побрзаме да се затрупа телото. Се што најдовме таму фрлавме, буниште беше тоа, се и сешто имаше. Потоа Палчо ги избриша лопатите и копачот со WD40 ги стави во Кангуто, влеговме позади во Кангуто јас и Боре, а Палчо возеше, а по нас тргна Велибор со Цитроенот. Потоа ми нареди да ги фрлам лопатите и копачот, и продолживме до местото каде што треба да се запали Цитроенот. Кога се вративме во партија, јас отворив Фејсбук, и видов дека се бара девојчето. Му ја покажав и сликата на Палчо и го прашав, што е ова? Не ми одговори ништо. Јас се повлеков во кујната, таму имав и кревет“, рече Кешишев.

Адвокатот Ефремов го праша дали знае чив е пиштолот и моторолите?

„Пиштолот колку што слушнав бил на Боре, но јас не можам да трвдам. Мотролите ги купи Палчо. Мислам дека се тоа беше ставено во ранецот, а ранецот беше секогаш во Палчо“, изјави Кешишев.

Претходно на барање на адвокатот на Кешишев, од судењето беше отстранет Палевски оти обвинетиот немало да ја зборува вистината ако гледал во него.