ЛДП: Го поддржуваме референдумот и очекуваме граѓаните масовно да излезат на гласање
Либерелно-демократската партија има јасен и недвосмислен став за поддршка на претстојниот референдум и затоа ги повикуваме граѓаните заедно да одлучиме за нашата иднина и да излеземе и да гласаме, велат од ЛДП преку соопштение.
„Пред нас е историски момент од кој зависи иднината на Република Македонија. Во овие моменти најважно е да се сплотиме и заеднички да се гордееме, бидејќи како држава немаме друга алтернатива освен ЕУ и НАТО.
Затоа ги повикуваме граѓаните масовно да излезат на референдумот и да одлучат за својата иднина“, пишуваат од партијата.
Тие сметаат дека за вакво прашање, политичките партии не треба да тактизираат и да се премислуват дали да се излезе на гласање или не, собирајќи ефтини политички поени.
„За сите нас Македонија е заедничка држава без оглед на религијата, етничката припадност, политичката определба и сите ние треба да одлучиме во каква држава ќе живееме.
Либерално-демократската партија е категорична дека одлуката на граѓаните е обрзувачка и единствено исправна!
Се обраќаме до сите граѓани на Македонија, да го поддржат референдумот и референдумското прашање како врвен демократски инструмент за изразување на волјата на граѓаните.
Имаме историска шанса за напредок, како Македонци и со нашиот македонски јазик и идентитет, да станеме дел од семејствата на ЕУ и НАТО.
Имаме обврска пред сегашните и идните генерации да овозможиме сигурна и економски просперитетна држава“, стои во соопштението од партијата.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа