Концентрацијата на олово во Крива Река зголемена за 10 пати

Десеткратно е зголемена концентрацијата на тешки метали во водите на Крива Река, информираше градоначалникот на општина Крива Паланка на прес-конференција Сашко Митовски. 

Прикажувајќи лабораториско истражување за кое вели дека направено во акредатирирана лабораторија Митовски рече дека концетрацијата на олово во Крива Река е зголемена за десет пати повеќе.

-Дополнително, за неколку стотици пати е зголемена концентрацијата на цијанид, фосфор, јазот во Крива Река. Оттука сакам да порачам дека општина Крива Паланка ќе бара и кривична одговорност, особено што за ваква хаварија Кривичниот законик предвидува и кривична одговорност, рече Митовски, повикувајќи го Јавното обвинителство веднаш да преземе мерки за санкционирање. 

Изворот на загадувањето, според градоначалникот на Крива Паланка, е рудникот Тораница. Митовски побара концесионерот на рудникот кривично да одговара.

-Имајќи предвид дека како резултат на ова загадување на Крива Река од страна на концесионерот на рудникот Тораница, загрозен е животот и здравјето на луѓето по текот на реката Тораница и Крива Река, но загрозена е и флората и фауната по водотекот, рече Митовски. 

Предупредува дека под ризик е и плодната земјоделска почва, но и посевите кои се наводнуваат токму од овие две реки и од реката Пчиња.

-Во ризик е ставен и сточниот фонд кој исто така се напојува од овие неколку реки, коишто индиректно се става во опасност и животот и здравјето на луѓето коишто ќе ги конзумираат овие земјоделски или сточарски производи, вели Митовски.