Фирми и управители затајувале данок – набавиле стоки, не ѝ платиле на државата и го оштетиле буџетот за 295 илјади евра
Финансиската полиција до Обвинителството поднесе три кривични пријави за трговци со прехранбени производи поради даночно затајување.
Станува збор за пријави против три физички и три фирми, кои свесно од 1 јануари до 25 април значителен дел од набавената трговска стока евидентирана како резерва, во износ од 112.727.586 денари, неосновано ја присвоиле за себе и не ја евидентирале во сметководствената евиденција на правните лица како кусок.
Притоа, тие не пресметале, не пријавиле и не платиле данок на додадена вредност по даночна стапка од 5 отсто во износ од 5.636.379 денари и данок на личен доход во износ од 12.524.718 денари, информираат од Финансиската полиција.
Со така преземените дејства пријавените му предизвикале штета на буџетот во вкупен износ од 18.161.097 денари.
Проверки се вршат и во други правни субјекти на територијата на целата држава.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
