Австралија ги забрани социјалните мрежи за лица под 16 години

Австралија гласаше за забрана на социјалните мрежи за деца под 16 години по емотивна национална дебата, што претставува преседан за владите ширум светот да наметнат една од најстрогите регулативи за големите технолошки компании.

Законот ги принудува технолошките гиганти како Мета, сопственик на Инстаграм и Фејсбук, и ТикТок да го блокираат пристапот до малолетниците за да избегнат да се соочат со казни до 49,5 милиони австралиски долари (околу 30,5 милиони евра). Тестирањето на методите за спроведување на законот ќе започне во јануари, а забраната ќе стапи на сила за една година.

Законот за минимална возраст за социјалните медиуми ја прави Австралија пример за се поголем број влади кои усвоиле или ја изразиле својата намера да усвојат закони за ограничување на возраста на социјалните мрежи поради загриженоста за нивното влијание врз менталното здравје на младите.

Франција и некои американски држави донесоа закони со кои се ограничува пристапот за малолетници без родителска дозвола, но забраната во Австралија е апсолутна. Целосната забрана на Флорида за помлади од 14 години во моментов се оспорува на суд поради слободата на говорот.

Донесувањето на законот претставува политичка победа за лабуристичкиот премиер Ентони Албанес, кој се соочува со избори следната година и кој, според анкетите, ужива намалена поддршка од гласачите. На забраната се спротивставија поборниците за заштита на приватноста и некои групи за правата на децата, но според последните анкети, 77 отсто од населението го сакаа тоа.