Уапсен поранешен шеф на ФБИ, работел за рускиот олигарх Олег Дерипаска
Поранешниот шеф на ФБИ Чарлс Мекгонигал е обвинет за кршење на американските санкции против Русија со примање тајни плаќања од олигархот Олег Дерипаска, изјави денеска обвинителот.
Мекгонигал, кој го предводеше одделот за контраразузнавање на ФБИ во Њујорк пред да се пензионира во 2018 година, беше уапсен во саботата, објави „Ројтерс“.
Според федералните обвинители во Менхетен, поранешниот висок функционер на ФБИ е обвинет дека водел истрага во име на Дерипаска против ривалски олигарх во замена за тајни плаќања од Дерипаска, со што ги прекршил американските санкции кон Русија.
Мекгонигал се очекува подоцна денеска да се појави пред федералниот суд на Менхетен заедно со Сергеј Шестаков, поранешен советски дипломат кој подоцна стана американски државјанин и исто така обвинет во случајот.
Обвинителите рекоа дека Мекгонигал (54), исто така работел во име на Дерипаска во 2019 година во неуспешен обид да ги оспори санкциите против него.
Дерипаска е основач на руската компанија за алуминиум „Русал“ и беше меѓу дваесетина руски олигарси и владини претставници на црната листа на Вашингтон во 2018 година како одговор на наводното руско мешање во американските избори во 2016 година.
Кремљ и Дерипаска негираа вмешаност во претседателските избори во САД.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
