Студен бран ја зафати Грција, училиштата затворени

Студениот бран што ја зафати Грција донесе значителни врнежи од снег и ниски температури во многу делови од земјата. Северните региони беа први погодени, со снег што паѓа од утрово во градовите како Кожани, Флорина, Касторија, Драма и Сер. Поради овие неповолни услови, градоначалниците на Флорина, Ксанти, Драма и Преспа донесоа одлука денеска да ги затворат училиштата.

Во Солун утрово беа забележани снежни виулици во повеќе области, а се очекува значителен пад на температурата, особено во централните и северните делови на земјата.

Според временските прогнози, од утре, вторник 8 април, студеното време ќе се прошири и во остатокот од Грција. Во северните региони се очекува мраз, главно во утринските и вечерните часови, кој ќе трае до петок, 11 април. На островите во источниот Егеј се предвидуваат локално обилни дождови и невреме до пладне, додека во источна Тесалија, Споради и северна Евија се очекуваат обилни врнежи.

Вчера, силна бура проследена со град го погоди северниот регион Халкидики, со особено интензивни врнежи во областите на Палеохори и Мегали Панагија.