Протест на здравствените работници: Немаме време за немањето слух на властите

Протестираме за да покажеме дека не отстапуваме од нашите барања за зголемување на платите. Ако не не слушнат ќе се вратиме повторно и побројни, порачаа претставниците на Синдикатот за здравство кои денеска се собраа на протест пред Министерството за здравство.

Здравствените работници во организација на Самостојниот синдикат за здравство, фармација и социјална заштита, поддржани од Сојузот на синдикатите на Македонија (ССМ) протестираа за неселективно вработување, усогласување на платата согласно Законот за минимална плата и зголемување на коефициентите како додатоци на плата.

„Со протестот сакаме да го искажеме нашето незадоволство од непотпишаниот анекс на Колективниот договор и да укажеме на неминовноста, односно неопходноста од неговото потпишување веднаш по формирањето на новата влада“, изјави Љубиша Каранфиловски, претседателот на Самостојниот синдикат за здравство, фармација и социјална заштита.