Песков: Русија ќе бара нови патишта за нафта и гас по американските санкции

Русија ќе бара алтернативни патишта за испорака на своите енергетски производи за да ги минимизира последиците од американските санкции, изјави денеска портпаролот на Кремљ, Дмитриј Песков.

САД во петокот воведоа санкции за повеќе од 200 компании и поединци поврзани со рускиот енергетски сектор, како и за над 180 брода, со цел да се ограничи пристапот на Москва до меѓународните пазари и да се намалат приходите од извозот на нафта и гас.

Како дел од пакет-санкциите, се воведуваат и ограничувања за компаниите што се занимаваат со експлоатација и преработка на енергетски ресурси, како и за бродовите што се занимаваат со транспорт.

Според Песков, новите санкции против руските енергетски производи водат кон дестабилизација на светските пазари.

„Многу внимателно ќе ги следиме последиците од овие одлуки“, рече портпаролот коментирајќи ги американските санкции против раководството на „Росатом“ и ризиците за спроведувањето на проектите на компанијата поврзани со изградбата на нуклеарни централи во странство.

Претходно, САД воведоа најобемни санкции против рускиот енергетски сектор, објави американското Министерство за финансии. Санкции беа изречени и за руско-српската компанија „Нафтена индустрија Србија“ (НИС).