Иванов се сретна со началникот на ВС на Турција, генерал Озел

Претседателот на Република Македонија Ѓорге Иванов денеска го прими началникот на Генералштабот на Вооружените сили на Република Турција, генерал Неџет Озел.

На средбата, соопшти денеска Кабинетот на претседателот, е изразено задоволство од одличните билатерални односи меѓу двете земји, потврдени преку интензивната политичка соработка и континуираните средби на високо ниво.

Претседателот Иванов и генералот Озел изразиле подготвеност за натамошно јакнење на односите и за проширување и продлабочување на соработката.

Како особено значајна претседателот Иванов ја оценил поддршката на Република Турција во однос на аспирациите на Република Македонија за членство во НАТО. Во тој контекст е истакнат фактот дека амбасадата на Република Турција во Скопје од почетокот на оваа година е НАТО-контакт амбасада.

На средбата е истакнато интензивното ниво на соработка меѓу двете земји во областа на одбраната, преку редовни контакти на ниво на министерства за одбрана и на армиско ниво.

Шефот на државата Иванов меѓу другото истакнал дека еден од стратешките приоритети на Република Македонија е регионалната соработка и нејзино интензивирање во областа на економија, енергетика, инфраструктура и други полиња.

Македонскиот претседател го запознал високиот гостин од Република Турција со претстојниот Самит на Процесот за соработка на земјите од Југоисточна Европа и со форумот „Дијалог на цивилизациите“ што на 1-2 јуни ќе се одржат во Охрид и во Струга.

МИА