Шверцувале облека и ги полнеле бутиците - еве ги деталите од МВР за акцијата која ја тресе Македонија

Министерството за внатрешни работи, преку Одделот за сузбивање на организиран и сериозен криминал денеска реализираше обемна акција за сузбивање и документирање на криминалот, односно кривичните дела кои подолг период наназад биле вршени на Граничниот Премин „Ново Село“.

Со примена на посебни истражни мерки, биле идентификувани членовите на криминалната група, односно злосторничкото здружение кои во континуитет криумчареле огромни количини текстилна роба со која снабдувале бутици во повеќе градови низ државата. Како членови на оваа криминална група се идентификувани и повеќемина вработени во Царинската управа, меѓу кои раководителот на Царинската испостава „Ново Село“ и шестмина царински службеници од истиот граничен премин.

Освен нив, денеска беа приведени и шест физички лица поради основано сомнение дека сите заедно сториле повеќе кривични дела како „злосторничко здружување“ „злоупотреба на службена положба и овластување“, „криумчарење“, „фалсификување исправа“ и „употреба на исправа со невистинита содржина“.

Како што информира МВР; нарачателите на трговската стока (правни субјекти), кои стоката ја купувале во Бугарија и Грција претходно ја оставале на одредено, само за нив познато место во Бугарија или Грција. По претходен договор, превозниците ја преземале стоката и ја пренесувале во Македонија. Тие транспортот го вршеле преку граничниот премин Ново Село до однапред договорена дестинација и тоа секогаш кога на должност биле некои од царинските службеници-членови на злосторничкото здружение, кои не вршеле царинска контрола на возилата и трговската стока што се пренесувала, со цел да бидат избегнати задолжителните царински давачки. За извршениот транспорт, нарачателите на трговската стока, на транспортерите им плаќале одреден износ, а тие парите не ги зачувувале за себе, туку по секој извршен транспорт, одредена сума им предавале на цариниците.

Освен 13-те лица кои се лишени од слобода, досега се запленети и осум возила со кои е вршено кривичното дело, а отпочна и втората фаза на акцијата, односно во тек се мерки и активности кои се преземаат во координација со УЈП и Пазарна инспекција во поголем број објекти во кои се продавала криумчарената трговска стока на повеќе локации во Струмица, Скопје, Прилеп, Куманово, Василево, Виница, Тетово и Штип.