Хорор: Најмалку 11 лица го загубија животот во крвавото пукање во училиште во Шведска

Најмалку 11 лица се убиени во пукање во центар за образование на возрасни во градот Оребро, Шведска, соопшти утрово полицијата.

Осомничениот сторител е еден од загинатите, а се уште не се знае точно колку лица се повредени во вчерашниот напад.

„Сe уште немаме целосна слика за бројот на повредени“, рече портпаролот на полицијата, додавајќи дека не може да се исклучи бројот на жртвите да продолжи да расте, бидејќи информациите за состојбата на повредените пациенти кои се на болничко лекување се исто така нецелосни, јави шведскиот јавен радиодифузен сервис СВТ.

Полициската истрага продолжила во текот на ноќта и засега нема ништо што укажува дека сторителот дејствувал од идеолошки побуди, соопшти полицијата.

Напаѓачот имал 35 години и бил без какви било приходи. Во училиштето влегол вооружен со ловечка пушка. Тој  немал претходни пресуди за какво било кривично дело. Исто така, нема познати врски со криминални банди.

Полицијата претпоставува дека тој дејствувал сам, иако не ја исклучуваат можноста дека имало и други лица вмешани.

Центарот за образование за возрасни каде што се случи нападот се наоѓа на периферијата на градот Оребро, на околу 200 километри западно од Стокхолм.