САД: Русија е одговорна за смртта на Навални

Американскиот државен секретар, Ентони Блинкен, изјави дека Русија е одговорна за смртта на опозицискиот политичар Алексеј Навални доколку веста за неговата смрт е точна.

„Прво и основно, ако оваа вест е вистинита, нашите мисли се со неговата сопруга и семејството“, рече Блинкен во Минхен, каде што присуствува на безбедносна конференција, пренесува „Ројтерс“.

Тој додаде дека смртта на Навални во руски затвор ги истакнува слабоста и гнилоста во срцето на системот што Путин го изгради.

„Русија е одговорна за ова. „Ќе разговараме со многу други земји, кои се загрижени за Алексеј Навални, особено ако се потврди дека овие извештаи се вистинити“, рече Блинкен.

Канцеларијата на Федералната казнено-поправна служба на Русија за автономниот округ Јамало-Ненец објави претходно денеска дека Навални се чувствувал лошо по прошетката и изгубил свест по што неуспешно бил реанимиран, а причината за смртта се утврдува.

Навални издржуваше 30-годишна затворска казна и беше познат како остар критичар на Кремљ.