Маж од Германија е петтиот излечен од ХИВ

Научниците објавија дека 53-годишен маж од Дизелдорф, Германија, е излечен од ХИВ. Детали за случајот изнесе др. Бјорн-Ерик Оле Јенсен во публикацијата Nature Medicine.

Човекот е наречен „Пациентот од Дизелдорф“ за да се заштити неговата приватност. Научниците велат дека случајот на Германецот е петти потврден случај на излечен од ХИВ, пишува „ABC“.

Иако деталите за неговиот успешен третман првпат беа објавени на конференцијата во 2019 година, научниците не можеа да потврдат дека пациентот бил официјално излечен во тоа време.

Денеска објавија дека пациентот веќе нема видлив вирус во телото, дури и откако пред четири години ги прекина лековите за ХИВ.

„Тоа е навистина лек, а не само долгорочна ремисија. Овој случај ни дава надеж, но има уште многу работа пред нас”, вели др. Џенсен.

За повеќето луѓе, ХИВ е доживотна инфекција, а вирусот не е целосно искоренет. Благодарение на современите лекови, луѓето со ХИВ можат да живеат долг и здрав живот.

Пациентот од Дизелдорф се придружува на мала група луѓе кои биле излечени во екстремни околности по трансплантација на матични клетки, која обично се изведува само на пациенти со рак кои немаат други опции.

Трансплантацијата на матични клетки е процедура со висок ризик која ефикасно го заменува имунолошкиот систем на една личност. Примарната цел е да се излечи пациентот од рак, но процедурата во неколку случаи доведе и до излекување од ХИВ. Сепак, трансплантацијата на матични клетки е комплицирана процедура која носи многу ризици и затоа е ризично да се понуди како лек за сите луѓе со ХИВ.

ХИВ навлегува во клетките на имунолошкиот систем и ги уништува. Без третман, СИДА може да се развие. Лицето со СИДА не може да се бори ниту со мала инфекција.

Во светот има околу 38,4 милиони луѓе со ХИВ, а третманот помина долг пат. Со современи лекови, заболените од ХИВ можат да живеат со години, а дополнително во тек е истражување кое ја проучува превенцијата од инфекција со вакцината за ХИВ.

Првиот човек кој е излечен од ХИВ е Тимоти Реј Браун. Научниците го објавија неговиот случај како пациент од Берлин во 2009 година.

Потоа во 2019 година следеше опоравување на пациент од Лондон.

Пред една година беше објавено дека пациент од Њујорк и пациент од американската болница Градот на надежта се излекувани од ХИВ.