Извлечено едно тело од урнатиот авион во кој беше фудбалерот Сала, се чека обдукција

Три дена откако приватните истражувачи го пронајдоа авионот на фудбалерот Емилијано Сала, англиските медиуми експресно ја објавија веста дека доцна вчера било извлечено едно тело од авионот кој е потонат длабоко во морето.

Приватната агенција за истраги и несреќи објави дека телото не се знае во моментов дали е на фудбалерот или пак на пилотот Дејвид Ибботсон и е предадено на обдукција.

Од истражувачката агенција се пренесува дека условите за спроведување на акцијата биле навистина отежнати, но и покрај тоа, биле вложени максимални напори поради кои телото било извлечено со специјален подводен уред. Поради лошите временски услови и лошата прогноза во наредните денови, во објавата се надополнува дека оклопот на авионот може и никогаш да не биде извлечен од дното, а дополнителен повод за тоа секако може да биде и фактот што нема трага од друго тело во близина на потопеното летало.

Сепак, најважна вест е тоа што операцијата за извлекување на телото била извршена успешно, па во овој момент се работи за разрешување на единствената непозната од оваа акција, односно идентификација на трупот.

Извлеченото тело е пренесено на Островот Портланд, а по работата која им престои на форензичарите, во најбрз можен рок се очекуваат и резултати од идентификацијата.