Разнишана атмосфера на Србите во пресрет на мечот со Македонија

Во пресрет на вечерашниот, клучен натпревар меѓу Македонија и Србија на Европското првенство, превирања во редовите на српската репрезентација.

Откако вториот голман на Србија, Славиша Ѓукановиќ поради недоразбирање со колегата Дарко Станиќ реши да ја напушти репрезентацијата, останатите ракометари и стручниот штаб го осудија овој потег на голманот.

„Славиша Ѓукановиќ повеќе не е член на ракометната репрезентација на Србија. По приемот на одлуката на селекторот дека на следниот меч со Македонија место него ќе биде Драган Марјанац, што според правилата и прописите не значи крај на учеството на Ѓукановиќ на ЕП, играчот не го соопшти своето незадоволство на селекторот, и место тоа по социјалните мрежи го искажа својот став. Неговото однесување и изјави се апсолутно неодговорни. Лошата организација во репрезентацијата, како што тој вели, воопшто не е вистина. И тие негови изјави мора да се осудат“ - се вели во соопштението од ракометарите на Србија.

Србите признаваат дека ова разнишало атмосферата во нивните редови, пред денешниот натпревар со Македонија, но од друга страна, им влеало и дополнителен мотив за пресметката која треба да реши која од овие две селекции ќе се пласира во следната фаза на шампионатот.