Мицкоски оптимист по средбите во Вашингтон: Македонија меѓу првите земји со договор за слободна трговија со САД

Премиерот Христијан Мицкоски по средбите на министерот за надворешни работи и надворешна трговија Тимчо Муцунски и официјални лица,  во Вашингтон изјави дека впечатоците се исклучително високи, одговарајќи на новинарски прашања, за можен договор за слободна трговија, денеска на настан за одбележување 80 години од државен завод за статистика во Скопје. Премиерот нагласи дека на средбите била истакната стратешката соработка и знаењето на соработката помеѓу двете земји.

- Впечатоците се исклучителна високи. Јас можам да кажам дека Тимчо Муцунски е помеѓу првите седум министри за надворешни работи од Европа којшто на билатерално ниво беа примени од страна на државниот секретар Марко Рубио во Стејт Департментот во САД. Средбата траела околу 45 минути на којашто уште еднаш е истакната стратешката соработка и значењето на стратешката соработка помеѓу двете земји. Досегашната исклучително искрена соработка со администрацијата на претседателот Трамп и очекувањата за во иднина, изјави премиерот.

Во однос на очекувањата, претседателот на Владата, кажа дека неговите очекувања се позитивни, како резултат на средбите.

- Околу тие очекувања, јас не би сакал сега многу да зборувам сакам да се случат, а дури потоа да коментираме, но какви се моите очекувања. Моите очекувања се позитивни и како резултат на средбата со господинот Грир, но и моите телефонски разговори што ги имав со државниот секретар за економија, господин Хауард Лутник, така што очекувам да бидеме, исто така меѓу првите земји во светот којшто ќе добијат таков тип на договор со САД, рече Мицкоски.

Министерот за надворешни работи и надворешна трговија Тимчо Муцунски на неговиот Фејсбук профил објави дека за време на посетата на Вашингтон, остварил уште една значајна средба со Џејмисон Грир, трговски претставник во администрацијата на американскиот претседател Доналд Трамп, а претходно на 29 мај, како што е објавено на министерството за надворешни работи, Муцунски оствари билатерална средба со државниот секретар на Соединетите Американски Држави, Марко Рубио.