Меџити: Обезбедивме 2,5 милијарди денари за чиста вода, здрава средина и безбедна инфраструктура во општините

Министерството за животна средина и просторно планирање испорачува најголема поддршка досега за локалната еколошка и инфраструктурна обнова.

Денеска беа потпишани договори со кои на 51 општинa ќе им бидат распределени околу 2,5 милијарди денари за реализација на 143 инфраструктурни проекти во областа на водоснабдување, канализација, атмосферска заштита и регулација на речни корита.

"Ова се инвестиции во достоинството на граѓаните и одговорноста кон природата. За првпат инвестираме на толку широк фронт, во сите делови на државата. Граѓаните мора да чувствуваат дека институциите работат за нив и дека промената е видлива, а иднината е вредна“, изјави првиот заменик на Претседателот на Владата и министер за животна средина и просторно планирање, Изет Меџити.

Со овие средства ќе се изградат или реконструираат:

•             пречистителни станици,

•             фекални и атмосферски канализациони мрежи,

•             водоводи и резервоари,

•             SCADA и ГИС системи за следење и управување,

•             системи за одведување отпадни води и

•             урбана опрема за управување со отпад.

Ова е досега најобемната поддршка што Министерството ја реализирало преку капитални дотации до општините, со цел да се подобрат условите за живот, да се спречат поплави, загадување и да се овозможи одржливо планирање во урбаните и руралните средини.