Зеленски побара поддршка од Индија за постигнување мир

Украинскиот претседател Володимир Зеленски побара поддршка од Индија за спроведување на мировната формула за ставање крај на војната во Украина по телефонскиот разговор со индискиот премиер Нарендра Моди.

Зеленски рече дека ја искористил можноста да го објави својот мировен план. „Сега сметам на учеството на Индија во неговото спроведување“, напиша украинскиот претседател на Твитер и му се заблагодари на Моди за хуманитарната помош и поддршката на Индија во ОН.

Тој има намера да ја претстави својата „формула“ на мировниот самит. Киев бара целосно повлекување на руските сили од украинска територија како предуслов за одржување на самитот.

Индија зазеде неутрален став во конфликтот и одржува врски и со Русија и со Западот. Земјата не поддржува економски санкции против Русија и повикува на дијалог меѓу завојуваните страни.

Њу Делхи продолжува да увезува релативно евтина руска нафта и е силно зависен од Русија за воени резерви.

Индија во моментов претседава со Г20. „Моди ги објасни главните приоритети на индиското претседателство со Г20, вклучително и истакнување на загриженоста на земјите во развој во врска со безбедноста на храната и енергијата“, соопшти неговиот кабинет по телефонскиот разговор со украинскиот претседател.