(ВИДЕО) Кузеска: “Картел при јавни набавки“, нов скандал со фирми поврзани со Сања Божиновска

Енергетски картел при јавни набавки е нов скандал со фирми кои се поврзуваат со Сања Божиновска, изјави на денешната прес-конференција Богданка Кузеска, портпаролка на СДСМ.

Деталите ги објави еден релевантен медиум во земјава и покажуваат дека фирмите во кои била дел и  Божиновска имале пријави од македонските институции за незаконско работење и малеврзации, рече Кузеска.

„Во 2014 година, во време на ВМРО-ДПМНЕ, Комисијата за заштита на конкуренцијата повела постапка за забранет договор – картел при јавни набавки и донела решение за казни.

Фирми кои дел се поврзуваат и со Божиновска, формирале енергетски картел.  Со намера да ја диктираат цената на увозот на струја на тендерот на ЕЛЕМ спроведен во 2012 година и да профитираат.

И внимавајте, не се случило тоа еднаш, 11 пати биле прекршувањата, 11 пати! Па дали е ова нормално, секако дека не е!

За дел од овие фирми кои склучиле картел и Царинската управа открила затајување данок во износ од 1,8 милиони евра.

Ова е вморвска шема во енергетиката како во мафијашки филм. Со картели. Само наместо фавели има бел дворец.

Уште не е затворен скандалот со долгот на Божиновска гледаме дека има нов со картели и малверзации.

Молчи Мицкоски, молчи Божиновска за долгот од 1 милион евра кон државната МЕПСО.

Кој картел ги сврте 1 милион евра пари на граѓаните?

Ова ли се тие менаџерски способности за што Мицкоски ја постави Божиновска за прв човек во енергетиката?“, прашува Кузеска.

Кузеска посочи дека СДСМ се сомнева дека преку слични шеми се планираат малверзации и заработки од страна на Мицкоски и Божиновска и дека токму ова е причината за создавање на новото министерство.

„Токму ова ново министерство со кое управува сега Божиновска се посочува како можен извор на корупција од страна на Институт кој со години ги следи овие области.

Зошто Божиновска е министерка мора да одговори Мицкоски, овде нема случајности“, нагласи Кузеска.