Тошковски планира нови возила и униформи за полициските службеници

Министерството за внатрешни работи(МВР) планира да го обнови возниот парк, како и да ги поднови полицајците со нови модерни униформи, најави ресорниот министер Панче Тошковски. 

Министерот ова го кажа говорејќи околу планираните реформи и подоборувањето на условите за работа во Министерството во својот говорот на свеченоста по повод промоцијата на 497 нови полициски службеници од генерацијата 2024-2025 што денеска се одржа во Центарот за обука на МВР во Идризово.  

-Се градат, а и ќе се градат нови полициски станици, се планира обновување на возниот парк на Министерството, нови модерни и функционални униформи, материјално и техничко унапредување на сите организациони единици, нова систематизација, која ќе ја максимизира ефикасноста на полицијата, рече Тошковски.  

Тој се осврна и на процесот на дигитализација, кој, како што кажа е еден од врвните приоритети на Владата и на Министерството, што креира побрзи процеси и услуги, го штеди времето на граѓаните, а истовремено, додаде министерот, ја намалува и можноста од корупција.  

Тошковски во обраќањето пред новите полицајци и присутните на церемонијата, најави и зголемување на платите на сите вработени во Министерството за внатрешни работи, особено на оние кои, како што кажа, се најважна алка во синџирот на безбебедноста.  

-Секако во дијалог со сите вработени, преку дијалог со синдикатите одговараме на нивните потреби и тука најавувам подобрување на условите за работа и прекуредовно зголемување на примањата на сите вработени во Минитерството за внатрешни работи, посебно на полициските службеници кои се најважна алка во синџирот на безбедност, рече министерот.  

Во конктекст на реформите и подобрувањето на условите за работа во рамките на МВР, Тошковски го наведе и целосното реновирање на Центарот за обука на МВР во Идризово и реактивирање на средното полициско училиште.  

-Една од најважните реформи која се планира во насока на обезбедување професионалност, квалитет и интегритет во полициските редови е реактивирање на средното полициско училиште кое преку образовна настава во трета и четврта година ќе ги креира новите полициски службеници. Верувам дека ќе понудиме најдобри услови за работа и образование со цел да ги привлечеме најдобрите кандидати кои ќе испорачаат најдобри резултати, кажа министерот за внатрешни работи во своето обраќање.