СВР Битола со силен удар врз дрогата и оружјето: Уапсени 39 дилери

СВР Битола во текот на  месец мај во Битола, Прилеп, Демир Хисар и Македонски Брод лиши од слобода 39 лица, дилери на дрога и оружје и заплени поголемо количество на дрога и психотропни супстанции.

Во изјава за МИА, портпаролот на СВР Битола Сања Стаматова истакна дека полициските службеници ќе продолжат со интензивни мерки и борба против недозволена трговија со дрога и оружје.

-Само во овој месец, во општините Битола, Приле, Демир Хисар и Македонски Брод, лишени се од слобода 39 лица кај кои се пронајдени марихуана, семки од канабис, шишиња и шприцеви со течност, габична материја, грутчеста материја, прашкаста материја, паковки со кристална материја, дигитални ваги, предмети со остатоци од растителна и прашкаста материја како  и пронајде различна количина огнено оружје, односно пушки, пиштоли и муниција со различен калибар. Претресите се направени во куќи и станови, потоа преглед на лица и 6 патнички моторни возила при што одредени беа два притвори во траење од 30 дена. При преземање на мерки и активности за откривање на овој тип на кривични дела односно при преглед, затекнати со дрога беа и тројца малолетници на подрачје на Битола и два странски државјани на подрачје на Демир Хисар, посочи Стаматова.

Полициски службеници од СВР Битола ќе продолжат со преземање на интензивни мерки и активности во откривање и реализација на кривични дела во борбата со недозволената трговија со дрога и оружје како и секаков вид на криминал на подрачјето на СВР Битола, изјави за МИА, портпаролката на СВР Битола, Сања Стаматова.