Сијарто: Оружјето испратено во Украина може да заврши во други земји

Унгарскиот министер за надворешни работи Петер Сијарто предупреди вчера дека огромното количество странско оружје испратено во Украина може да предизвика хаос на други места во светот по завршувањето на конфликтот со Русија, изразувајќи стравувања од нови кризи во „нестабилните региони“, пренесува „Мандинер“.

Во главното обраќање на мировниот форум во Будимпешта во вторникот, Сијарто го истакна ставот на унгарската влада кон тековниот конфликт, велејќи дека тој ќе има пошироки последици надвор од границите на Украина.

„Има многу региони во светот каде што дури и мал дел од оружјето испратено во Украина може да доведе до сериозна нестабилност. Насилството и теророт може да се зголемат во и така нестабилните региони, што може да доведе до нов бран миграција. Каква гаранција постои дека оружјето испорачано во Украина нема да биде пренесено во други земји?“ рече тој.

Сијарто тврди дека само прекинот на борбите може да ја гарантира безбедноста на Унгарија, наведувајќи дека неговата земја е „првата изложена на опасност од ескалација“ со оглед на нејзината близина до Украина, со која се граничи.

„Затоа бараме итен прекин на огнот и мировни преговори, барем да дадеме надеж дека ќе се воспостави одржлив, долгорочен мир во регионот“, продолжи Сијарто.

Шефот на унгарската дипломатија додаде дека Унгарија гледа на конфликтот сосема поинаку од многу нејзини западни сојузници, сугерирајќи дека некои партнери имаат мал интерес да стават крај на крвопролевањето.

Тој остана на ставот дека постои глобално мнозинство за прекин на огнот, но дека тоа е под „голем притисок од поддржувачите на војната“, меѓу кои има западни претставници, медиуми и невладини организации.

Сијарто, исто така, ја осуди „хистеријата со санкции“ што зафати многу членки на Европската Унија.

Тој тврди дека казните наметнати на Москва не направиле ништо за да ги прекинат борбите во Украина и не успеале да ја уништат руската економија како што беше планирано. Наместо тоа, Сијарто тврди дека ЕУ претрпела поголема штета од сопствените мерки, нарекувајќи ја кампањата неуспешна.

Дипломатот претходно алармираше на недостигот од надзор за западното оружје вредно милијарди долари што ја преплавува Украина, истакнувајќи дека дел од него на крај би можело да се појави во Африка и да создаде сериозни безбедносни ризици за континентот.

Будимпешта се спротивстави на притисокот за снабдување со оружје на Киев откако избувна конфликтот со Москва во февруари 2022 година, а унгарскиот парламентот лани усвои дури и закон за забрана на таквите трансфери на оружје. Унгарија во голема мера ги отфрли и санкциите на кои инсистираа САД против Русија, а премиерот Виктор Орбан е меѓу најгласните критичари на политиката во ЕУ.