Расте интересот за тужбата на принцот Хари против „Дејли мејл“

Принцот Хари, војводата од Сасекс, во вторникот пристигна во лондонскиот Висок суд на вториот ден од подготвителното рочиште во тужбата против „Асошиетед њузпејперс“ (АНЛ), издавачот на „Дејли мејл“, за нарушување на приватноста.

Враќањето на принцот во британската метропола е поврзано со неговата тужба за наводно прислушување и повреда на правото на приватност.

Кон тужбата се придружија и Елтон Џон и неговиот сопруг, актерките Сејди Фрост и Елизабет Харли, и разни благородници.

АНЛ бара отфрлање на случајот. Во официјалното соопштение издавачот апсолутно и целосно ги демантира, како што ги нарече, апсурдните наводи.

А неочекуваното појавување на војводата на првиот ден од рочиштето во понеделникот предизвика медиумска бура,

Хари покажа дека не блефира во одмаздата против сопственикот на „Дејли мејл“, гласи насловот во „Гардијан“, каде што авторите на текстот, Метју Вивер и Џим Вотерсон, нагласуваат дека појавувањето на суд во врска со приватната тужба за приватност не треба да биде изненадување со оглед на омразата на принцот кон „Асошиетед њузпејперс“.

Глетката на принцот Хари како маршира по скалите на високиот суд беше шок. На дневен ред е рочиште пред главна расправа во врска со неговата тужба против издавачот на весникот „Дејли мејл“.

Ова не беше ветувачки материјал за судска драма. Но, присуството на Хари наеднаш го смени тоа бидејќи лавината објавени вести ја одбележа неговата изненадна посета на судот.

И вториот ден интересот за случајот се чини дека не стивнува.

Зошто принцот Хари поведе тужба против сопственикот на „Дејли мејл“?

Принцот Хари им се придружи на Дорин Лоренс и уште пет други личности од висок профил во поведување судска постапка против матичната компанија на „Дејли мејл“ и „Мејл он сандеј“. Тие тврдат дека весниците се занимавале со разни незаконски активности со цел да добијат информации што ќе ги искористат во вестите.

Седумте лица тврдат дека многу форми на незаконско собирање информации биле извршени во име на „Мејл“ или „Мејл он сандеј“.

Наводите за незаконско однесување вклучуваат следење говорна пошта, прислушување фиксни телефони, лажирање приватни медицински картони преправајќи се дека е дотичното лице за кое станува збор, па дури и нарачан упад и влегување во приватна сопственост.

Повеќето од наводите сугерираат дека незаконските дејства ги извршиле надворешни приватни истражувачи, кои добивале инструкции од новинари во „Дејли мејл“ и „Мејл он сандеј“, а не репортери директно вработени во весниците.

Тврдењата за незаконски дејства главно опфаќаат период од 1993 до 2011 година

Зошто прелиминарното рочиште привлече толку големо медиумско внимание?

Истакнатите личности намерно го искористија својот статус на славна личност за да привлечат внимание на случајот. Хари долета од САД за да присуствува на техничката расправа поради што сите светски медиуми го покрија овој настан. На првиот ден од расправата присуствуваа и Сејди Фрост, Елтон Џон, Дејвид Фурниш и Дорин Лоренс.