Прв случај на колера во Италија по 50 години - пациентот е во изолација

Постар маж се наоѓа на одделението за заразни болести во болницата Сантисима Тринита во Каљари, на островот Сардинија, откако беше потврдено дека заболел од колера. Неговата состојба е стабилна, а бидејќи не патувал никаде во странство, започната е истрага за потеклото на инфекцијата. Познатиот италијански експерт за заразни болести Матео Басети смета дека инфекцијата најверојатно потекнува од морска храна.

Како што пишува весникот Unione Sarda, мажот ги забележал симптомите на почетокот на месецот, што уште повеќе го отежнува откривањето на точното потекло на инфекцијата.

Во тек се прегледите на сите членови на неговото семејство, без разлика што во моментов немаат симптоми.

Пациентот имал гастроинтестинални поплаки. По извесно време поминато на редовното одделение без никакво подобрување, тој бил префрлен на инфективното одделение.

„Многу е веројатно оваа инфекција да настанала преку морските плодови, доколку ги јадел сирови, а биле заразени со бактерии. Неопходно е да се каже дека не е пожелно да се јаде сирова морска храна. Добиваме многу стомачни инфекции токму поради тоа што јадеме сирова риба и морски плодови. Потребно е секогаш да ги готвиме или пржиме, како и да ги миеме рацете откако ќе допреме сирова риба или морска храна“, изјави Матео Басети, директор на клиниката за инфективни болести Поликлинико Сан Мартино во Џенова.

Пациентот е во изолација, а резултатите од истрагата ќе стигнат на 13 јули.