Пријавени 511 случаи на грип во Македонија минатата недела, најмногу во Скопје

Во текот на 13. недела од 2025 година - од 24 до 30 март, во државава се пријавени 511 случаи на групни пријави за заболени од грип - заболувања слични на грипот. Тоа претставува за 39,1 отсто помалку во споредба со претходната недела. Бројот на пријавени лица оваа недела, споредено со 13. недела од минатата сезона е зголемен за 3,1 пати, а во споредба со бројот за 13. недела од типичната епидемиска крива, моделирана од последните 14 сезони, зголемен е за 53,6 проценти, информираат попладнево од Институтот за јавно здравје.

Новозаболените се пријавени од 20 ЦЈЗ/ПЕ, Скопје - 198, Тетово - 67, Гостивар - 51, а во останатите, бројот на заболени е помал или еднаков на педесет.

Во текот на оваа недела, во девет извештајни единици се регистрира многу ниска, во 10 - сезонска, а во Македонски Брод - средна активност на вирусот на грип.

Во сезоната 2024/2025, вкупниот број на случаи на грип - заболувања слични на грипот изнесува 25.011, покажуваат податоците на Институтот.

Во споредба со истиот период од минатата сезона, бројот на пријавени случаи е зголемен за 72,6 отсто, а во однос на моделот од последните 14 сезони, се регистрира зголемување од 22,7 проценти. Кумулативно, заболените се пријавени од дваесет и девет ЦЈЗ/ПЕ. Најголем број на заболени лица се регистрира на територијата на Скопје, додека највисока кумулативна инциденца е регистрирана на територијата на Дебар.

Заклучно со 13. недела, во државава вакцинирани се вкупно 72.294 лица со бесплатна или комерцијална вакцина против грип.