Пеевски: Николоски да се прогласи за персона нон грата во Бугарија

Претседателот на бугарската партија Движење за права и слободи (ДПС), Делјан Пеевски смета дека доколку во Бугарија има соодветни државни институции и служби, вицепремиерот и министер за транспорт во македонската Влада, Александар Николоски веднаш треба да биде прогласен за персона нон грата во неговата земја. Како што пренесуваат бугарските медиуми, според него, „тоа е најмалку што треба да се направи по систематското сеење омраза кон Бугарија и бугарскиот народ“.

-Дрскоста и ароганцијата во однос на Бугарија, нејзините демократски избрани институции, демонстрирана од проруската влада на Мицкоски е јасно одговор на категоричната евроатлантска позиција на нашата земја.

Инсистираме на итни мерки како одговор на провокациите, кои треба да бидат конзистентни и категорични, нагласил Пеевски.

Лидерот на партијата оценува дека „проблемот веќе не може да се реши со едно формално извинување“.

-Раздорот е вредносен и се спротивставува на два света – оној на евроатлантските демократии и оној на пропутинската, антидемократска закана.

Како европска држава не можеме да останеме пасивни или псевдодипломатски, туку мораме да ја заштитиме честа и достоинството на Бугарија и на бугарските граѓани, оти во спротивно би учествувале во легитимирање на јасни канали на проруско влијание во срцето на Европа, додал Пеевски.