Кузеска за ВМРО-ДПМНЕ: Наместо професионализација и промени коишто се ветуваа гледаме партизација пред квалификација
Ако се анализираат кадровските решенија кои во прва фаза ги назначи Владата на ВМРО-ДПМНЕ, многу е очигледно дека Мицкоски посега по стари кадри, изјави на денешната прес-конференција, Богданка Кузеска, портпаролка на СДСМ.
„Така со Фондот за здравство ќе раководи Сашо Клековски, кој иако е лекар никогаш не работел во здравството.
Како тој и со кое знаење ќе ја води оваа комплексна и многу важна институција?
Клековски беше редовен учесник на телевизиските дебати, каде ревносно ги бранеше политиките на ВМРО ДПМНЕ.
Очигледно единствено таа „квалификација“ му ја обезеди позицијата в.д. директор на Фондот за здравство.
На директорско место во Управа за извршување санкции е назначен Александар Пандов, дипломиран историчар кој ниту има соодветно образование од оваа област ниту искуство.
Работа во приватниот сектор кај Самсоненко, водејќи една од неговите компании за обложување не може да биде соодветна компетенција за оваа позиција.
Очигледно и затоа со назначување на в.д. директори Владата ја заобиколува неопходната процедура за избор на директори.
Назначувањето на Коце Трајановски за в.д директор пак е директна потврда дека кадровските политики значат враќање назад кон претохдното владеење на ВМРО-ДПМНЕ а не промена.
ВМРО-ДПМНЕ го враќа градоначалникот кој го спроведе најголемиот градежен криминал во историјата на земјата, проектот Скопје 2014.
Му се даваат 600 милиони евра во рацете и моќ да раководи со најголемите инфраструктурни и градежни проекти. Иако во исто време, Коце Трајановски е косопственик и управител на фирма чија дејност опфаќа и градежништво, нагласи Кузеска.
Кузеска додаде дека ова што го прави ВМРО-ДПМНЕ на почеток на мандатот не е промена.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
