Драма во Белгија: Полицијата убила вооружан пациент во психијатриска клиника

Белгиската полиција денеска застрела и уби пациент кој носел ладно оружје во психијатриска клиника во Брисел, соопшти локалното обвинителство.

Полицијата била повикана бидејќи 49-годишниот маж почнал да се однесува агресивно во психијатрискиот институт „Фонд Роат“, а персоналот на клиниката не можел да се справи со него, пренесе „АП“.

Обвинителството соопшти дека првите сознанија од истрагата покажале дека полицијата морала да повика засилување откако првата патрола пристигнала на местото на настанот, поради особено опасното однесување на лицето и состојбата на вознемиреност.

„За време на акцијата полициските службеници морале да го употребат службеното оружје“, соопшти обвинителството, додавајќи дека тој бил застрелан во раката и стомакот, а од повредите починал откако бил пренесен во болница.

Обвинителството најави дека комисијата која врши надворешен надзор над белгиската полиција ќе го испита случајот.