Иванов во Виена: ЕУ да остане достојна на визијата за обединет и отворен континент

Претседателот Ѓорѓе Иванов денеска се обрати на третиот годишен состанок на Центарот за глобален дијалог и соработка  во Виена. Тој пред присутните истакна дека петтиот позитивен извештај на Европската комисија за Република Македонија е шанса ЕУ да го оправда сопствениот кредибилитет и да овозможи почнување преговори за членство.

- Декемврискиот Европски совет веројатно ќе го има предвид она што се случи со Украина. Советот ќе има шанса потемелно да се посвети на Балканот. Потребна ни е забрзана интеграција, на сите земји од регионот, напомена шефот на државата.

Претседателот порача дека треба да се размислува надвор од шаблоните на евро и азиоцентризмот. Напредокот на земјите кои произлегуваат од овој простор и оние што сакаат да бидат поврзани со него, зависи, рече, од меѓусебната соработка и синергија: - Ниту евроцентризмот, ниту азиоцентризмот немаат иднина. Неопходно е збирно, синергетско гледање на нештата. Евроазија е повеќе од простиот збир на континенти и држави, мост меѓу Европа и Азија, меѓу разни региони и земји. Европа и ЕУ не можат без Азија. На Азија, пак, и се неоходни Европа и ЕУ. Неопходно е да ги гледаме низ призмата на вкупната добивка за сите нас, подвлече Иванов.

И според поранешниот претседател на Бугарија Петар Стојанов, актуелен прв човек на Центарот за глобален дијалог, Евроазија е новиот светски суперконтинент, економски феномен кој ќе овозможи соочување со глобалната криза и надминување на сиромаштијата. Интергирањето на Европа и Азија, заклучија учесниците, е гигантски процес, не политички или идеолошки, туку диктиран од правилата на пазарот.

Шефот на државата Иванов, кој е во работна посета на Австрија, вчера имаше средба со својот колега Хајнц Фишер. На средбата беше упатена јасна порака дека Македонија треба да ги почне преговорите за членство во ЕУ.