Заев: Реализираме патна инфраструктура и гасовод за нов подем на бизнис перформансите за пелагоднискиот регион

Претседателот на Владата на Македонија Зоран Заев, Заменик претседателот на Владата задолжен за економски прашања Кочо Анѓушев и министерот за транспорт и врски Горан Сугарески, во придружба на градоначалниците на Прилеп и Битола Илија Јованоски Наташа Петровска, веднаш после средбата со стопанствениците од Прилеп и Битола, членови на Стопанската комора на Пелагонискиот регион, ги информираа новинарите за најважните прашања од дебатата.

Премиерот Заев за медиумите истакна дека беше чест и задоволство да се оствари средбата со претставниците на бизнис заедницата на Пелагонискиот регион кои придонесуваат со 12 отсто од БДП-то на нашата држава, за да ги чујат проекциите за целите на економските политики за поддршка на нивните дејности, како и за други теми кои директно влијаат на подобрувањето на нивните бизнис перформанси.

„Ги информирав стопанствениците дека во септември ќе влеземе во завршницата и на гасоводниот крак до Битола. Во меѓувреме, ги анализираме можностите за субвенции или евтини кредити за приспособување на внатрешните инсталации и опрема.

Решавањето на патната инфраструктура во Пелагонискиот регион ќе поттикне развој. Информирав дека реализацијата на експресниот пат Градско – Прилеп, преку Росоман и Дреново, оди според предвидената динамика. Веруваме дека ќе биде завршен до крајот на оваа година, како што е планирано“, нагласи премиерот Заев во изјавата за медиумите.

Дополнително тој им пренесе на претставниците на медиумите дека информирал дека оваа година ќе се заврши проектната документација за автопатот Прилеп – Битола, како и проектната документација за обиколницата околу Битола и експресниот пат до Меџитлија кон Грција, со што се отвораат перспективите за полесна комуникација со нашиот сосед со кој отвораме нови страници за економска соработка.

„Ги прифаќаме сугестиите за забрзување на имплементацијата на дуалното, стручно образование, кое ќе продуцира кадри неопходни за работата и на домашните и на странските компании. За ова имаме огромна поддршка од Сојузна Република Германија која ќе ни го понуди нивното искуство и ноу-хау за трајно решавање на ова прашање. Ги охрабрив стопанствениците уште поинтензивно да ги искористат можностите што ги нудат мерките од Планот за економски раст со кои ги стимулираме и помагаме компаниите да исплаќаат повисоки плати и и да вработуваат високо-квалификуван кадар“, потенцираше Претседателот на Владата на РСМ Заев во изјавата за медиумите после средбата со стопанствениците од Прилеп и Битола, членови на Стопанската комора на Пелагонискиот регион.

На прашање на Новинарите за исходот од средбата на владината делегација со вработените и менаџментот на „Еурокомпозит“, Вицепремиерот Анѓушев истакна  дека со посветена и напорна работа, конечно е најдено решение за компанијата.

„Сите знаат дека проблемот со „Еурокомпозит“ е долготраен,овој проблем не настана во последните две години, „Еурокомпозит“ е со блокирана сметка веќе 7 години. Не беше лесен процесот да за компанија која има негативен капитал се најде инвеститор. Имаме две можни решенија. Едното е во рамките на тековните прооцеси, доколку некои проекти се реализираат  „Еурокомпозит“ да биде саниран во постојниот формат. Доколку тоа не се случи во наредните 10-ина дена, второто решение е да се надмине проблемот слично како што се случи со Фени. Согласно Законот, доколку компанијата има блокирана сметка 45 дена, треба да влезе во стечај, а оваа компанија е со блокирана сметка 7 години, па преку стечај со реструктурирање и наоѓање на стратешки инвеститор да се надмине проблемот“, нагласи Анѓушев.

Во делот на изјавите за медиумите свое обраќање имаше и министерот за транспорт и врски Горан Сугарески кој нагласи дека реализацијата на патната инфраструктура влегува во фаза на изразено динамична фаза и дека сите проекции се дека сите патни правци во изградба или реконструкција ќе бидат остварени според предвидениот план.