Вардар ја продолжи победничката низа
И покрај уморот од гостувањето во Полска кај Висла во Лигата на шампионите, вардарци покажаа дека можат во континуитет да одиграат квалитетно и дека има долга клупа на која има квалитетни ракометари.
Во домашниот состав поради повреда на грбот го немаше голманот Страхиња Милиќ, а одмор добија и бековите Даинис Криштопанс и Жоан Кањељас. На листата на повредени е и крилото Владо Недановски. Шанса повторно да играта добија Мартин Поповски и Тоше Ончев.
Дуелот со словачкиот тим „црвено-црните“ може да се каже дека го добија уште во првото полувреме во кое се стекнаа со предност од седум голови (18:11). Во еден момент од вториот дел имаа и плус 8, доволно за мирен финиш и сигурна победа.
За Вардар ова беше четврти триумф на исто толку средби од СЕХА, додека словачкиот тим го запиша вториот пораз.
На другите два вчерашни дуела: Мешков Брест – Динамо Панчево 29:26, ППД Загреб – Цеље 25:25.
Табела: Вардар 12 бода, ППД Загреб 7, Цеље 7, Металург 6 (натпревар помалку), Татран 6, Мешков Брест 6, Горење 3, Нексе 3, Динамо Панчево 3, Војводина 0.
Веќе в сабота во Скопје гостува француски Нант во второто коло од Лигата на шампионите.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
