Инвестиција од милион евра ќе отвори нови работни места - Чојлија ќе добие нов логистички центар

Денеска  во мултифункционалната индустриска зона Чојлија беше поставен камен темелник за изградба на нов логистички центар, инвестиција на компанијата „Глобекс“ ДОО Скопје.

Во логистичкиот центар  ќе бидат инвестирани милион евра и за почеток ќе бидат отворени 30 нови работни места, најави по поставувањето на камен темелникот министерот за транспорт и врски Миле Јанакиески.

Објектот, што се гради на површина од 7.000 метри квадратни, треба да биде завршен во првиот квартал следната година.

- Инвестицијата дополнително ќе придонесе за општина Петровец и за Република Македонија. Предвидени се 30 вработувања во првата фаза, а вкупниот број на вработени што се планираат е 360,  изјави Јанакиески.

Според него,  Владата во соработка со општините постојано презема активности за урбанизирање на што повеќе парцели за изградба на индустриски центри и да им се излезе во пресрет на компанииите со поволни цени и услуги. Така, нагласи, ќе се изградат нови капацитети, а крајната цел е што повеќе нови работни места.

Во индустриската зона Чојлија досега се продадени 65 парцели, а според Јанакиески, за дел од планираните активности наскоро ќе бидат поставени камен темелници.

- Очекуваме уште неколку камен темелници во текот на оваа година, а најмногу во 2014. Воспоставивме специјален софтвер со кој во соработка со општините го следиме исполнувањето на роковите за предвидената изградба и очекуваме многу бргу за две до три години ова да стане вистинско градилиште и индустриска зона во која ќе работат илјадници луѓе не само од општина Петровец, туку и од околните, рече Јанакиески.