ЕУРО 2016: Гол и асистенција на Роналдо за финале на Португалија
Со погодокот во 50.минута и асистенцијата за Нани три минути подоцна, Кристијано Роналдо беше најзаслужниот за победата на Португалија над Велс со 2:0.
Триумфот за Португалците синоќа во Лион, прв извојуван во основните 90 минути по петте ремија, значи пласман во финалето на Европското фудбалско првенство што се одржува во Франција.
Ова ќе биде второ учество на Португалија во завршницата од едно континентално натпреварување. Првото финале го играа на свој терен против Грција во 2004 година и го загубија.
По натпреварот, покрај победничката репрезентација, со овации беше испратен и Велс, селекција која со пласманот меѓу четирите најдобри и го донесе најголемиот успех во историјата на островската земја.
Противникот на Португалија за големото финале ќе биде познат вечерва по одигрувањето на вториот полуфинален меч на ЕУРО 2016 меѓу домаќинот Франција и актуелниот светски првак Германија.
Натпреварот ќе се игра на „Велодром“ во Марсеј со почеток во 21 часот.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
