Деца од Кисела Вода делеа мартинки

Дечиња од јавните градинки во општина Кисела Вода денеска делеа црвено-бели исплетени мартинки за среќа. Местото Чешма, декорирано во боите на празникот Ксантика, беше локацијата на која сите посетители и случајни минувачи можеа да ја погледнат програмата и да добијат продарок изработен од дечињата и нивните учителки и родители.

Настанот почна со приредба на дечињата кои облечени во македонски народни носии, играа традиционални македонски ора. На посебно поставен штанд, беа изложени различните изработки, во црвена и бела боја, во најразлични ликовни техники.

Својата креативност на тема „Црвеното и белото израз на љубовта, животот, радоста, чистотата и пролетта”, децата, во изминатиот период ја искажуваа преку работилници, и најразлични други активности кои се одвиваа и во ЈДГ” 8 Март” и во ЈДГ “Весели цветови”.

Од волница, хартија и платно тие исплетоа преку 800 мартинки кои подарени на случајните минувачи освен што им го разубавија денот, им евоцираа и спомени од детството, од младоста, кога одбележувањето на овој празник посветен на пролетта, љубовта, цвеќињата и убавината било традиција.  

Се верува дека мартинките им носат многу среќа на оние што ги имаат на себе, без разлика дали е тоа на раката, вратот или на некој дел од облеката. Се носат цел месец или сè додека не се види првото расцветано дрво, а потоа се закачуваат на дрвото, со желба за здравје и среќа на семејството.

Летник или Ксантика е старомакедонски празник поврзан со светлината, обединувањето, сплотувањето, љубовта, среќата. Одржувајќи ја традицијата на предците кои му давале големо значење на денешниот датум, општина Кисела Вода, со организирање на денешниот настан, дава свој придонес во обидот да се зачува овој празник на мапата на македонските празници и случувања.