"Само се запрашав ќе умрам ли јас сега?!" - исповед на скопјанка заразена со ХИВ

Една „мала“ грешка го промени животот на 26-годишната Мимоза. Таа се соочила со смртта инфицирајќи се со ХИВ, кој го добила од едниот од тројцата партнери што ги имала во животот. Дневник ја пренесува потресната животна приказна на скопјанката.

 - Тоа беше шок за мене…, не размислував за ништо, само си го поставив прашањето – ќе умрам ли јас сега, до кога ќе можам да живеам инфицирана со ХИВ? Не користев секогаш кондом, никогаш не пробав дрога, вирусот го добив по сексуален пат. Често луѓето мислат дека ако имаш многу сексуални партнери, си во голем ризик. Еве, имав само тројца партнери, од кој едниот имал ХИВ, а јас од него го добив вирусот – раскажува 26-годишната Мимоза од Скопје.

Мимоза е една од 194 лица заразени со ХИВ-вирусот во Македонија. Таа денес има и нов партнер, кој ја прифатил без предрасуди.

- Тоа не беше лесно, не знаев каква ќе биде неговата реакција, но добив целосна поддршка. Ми требаше околу три месеци да се решам да соопштам дека сум инфицирана со ХИВ. За цело време користевме кондом, а и тој направи ХИВ-тест, и тоа три пати за да се увери дека е негативен. Тоа беше доволен показател дека со кондом не може да се пренесе вирусот,  додава несреќната скопјанка.