Највисоката жена на светот успешно се врати во Турција со авион: За удобен транспорт, компанијата отстрани шест седишта

Румејса Гелги, највисоката жена во светот, која минатата година првпат се качи на авион откога компанијата „Туркиш ерлајнс“ ја приспособи внатрешноста на авионот за да може да се смести и удобно да патува, успешно се врати од САД во Турција.

Румејса, по потекло од Турција, на почетокот на минатата година е запишана во Гинисовата книга на рекордите со висина од 2,15 метра како највисока жена во светот. Таа го држеше и рекордот како највисока тинејџерка.

Таа потоа рече дека „секој недостиг може да се претвори во предност доколку се прифатите себеси онакви какви што сте“.

Најчесто се движи во инвалидска количка или со помош на други помагала, а нејзината висина е резултат на Виверовиот синдром, кој, меѓу другото, предизвикува и брз раст.

Дури минатата година Румејса првпат се качи на авион затоа што и како мала била превисока за да се смести на редовно авионско седиште.

Во септември таа отпатува во Сан Франциско благодарение на турската национална авиокомпанија, која отстрани шест седишта за Румејса да може удобно да се смести.

По пристигнувањето во Калифорнија, таа на „Инстаграм“ напиша дека патувањето било „беспрекорно од почеток до крај“.

А за враќањето на Румејса, „Туркиш ерлајнс“ ги препакува седиштата, така што највисоката жена на светот безбедно се врати дома.