Мексико: Пронајдени 12 осакатени трупови во конфликт меѓу картели

Осакатени трупови и распарчени делови од телата на 12 лица беа пронајдени во вторникот на седум локации низ градското подрачје на Монтереј, индустрискиот главен град на Мексико, откако новиот бран на насилство ги вознемири жителите на градот.

Овие ужасни откритија потсетуваат на крвавиот период од претходната деценија кога картелските конфликти го зафатија Монтереј, а телата на жртвите беа или оставени на улиците или обесени од мостовите на градот, пренесува Ројтерс.

Ваква бруталност денес генерално помалку се практикува во градот кој неодамна беше избран за локација за новата фабрика за автомобили Тесла.

Властите соопштија дека вчерашните судири се чини дека биле координиран напад и најверојатно биле предизвикани од внатрешни борби во рамките на криминалната група со седиште во пограничната држава Тамаулипас.

„Од пораките што беа оставени (на телата) може да се заклучи дека постои корелација (со внатрешни конфликти)“, рече Педро Хардон, државниот обвинител, одговарајќи на новинарски прашања.

Во локалниот печат кружат фотографии од наводно пронајдените пораки, а на социјалните мрежи се сугерира дека убиствата ги извршиле членови на североисточниот картел како одмазда за наводни инфилтрации во нивната организација.