Г20 усвои заедничка декларација што содржи и формулација за војната во Украина

Групата Г20 усвои декларација за консензус за прашањата со кои се соочува блокот, објави индискиот премиер, Нарендра Моди за време на самитот на групата, сигнализирајќи дека преговарачите ги решиле длабоките разлики околу формулацијата за војната во Украина.

Тој не соопшти детали за компромисниот текст.

„Врз основа на напорната работа на сите тимови, постигнавме консензус за Декларацијата на самитот на лидерите на Г-20. Го објавувам усвојувањето на оваа декларација“, им рече Моди на лидерите на Г20 во Њу Делхи.

Претходно, Моди го инаугурираше дводневниот состанок со тоа што ги повика членките да стават крај на „глобалниот дефицит на доверба“ и најави дека блокот дава постојано членство на Африканската унија во обид да ја направи порепрезентативна.

„Денес, како претседавач со Г-20, Индија го повикува целиот свет прво да го претвори овој глобален дефицит на доверба во доверба“, рече тој.

„Време е сите заедно да продолжиме напред“, додаде тој.

Групата е длабоко поделена околу војната во Украина, при што западните земји повикуваат на силна осуда на Русија во Декларацијата на лидерите, додека други бараат фокусирање на пошироки економски прашања.

Формулацијата може да биде слична на јазикот во декларацијата објавена во Индонезија на самитот во 2022 година, во која се истакнува дека иако повеќето земји ја осудуваат Русија за инвазијата, има различни ставови.

На претходниот нацрт на конечната изјава од 38 страници, во која увид имал Ројтерс, оставен беше празен ставот „геополитичката ситуација“, додека имаше договор за 75 други параграфи кои покриваат прашања од глобалниот долг и криптовалутите до климатските промени.