Дедо Методи – еден од последните чувари на инструментот ќемане

Македонскиот народен жичен инструмент „Ќемане“ речиси повеќе и да не се користи низ земјата, меѓутоа постои еден чувар на овој музички инструмент, а тоа е дедо Методи од село Црвулево.

Дедо Методи во разговор за „М нет“ раскажа дека најпрво научил да свири додека го гледал неговиот дедо, а потоа и татко.

Ќемането се изработува од повеќе типови на дрво, а дедо Методи сè уште го изработува од орев, круша и други дрва.

„Уште како дете научив да свирам. Татко ми имаше ќемане, учев полека и научив. Порано сè на ќемане се свиреше, немаше тапани како сега на свадбите. Секој треба да има мерак, убаво е да се научи да се свири на ќемане. Ги правам од дрво, од крушка, од орев и врба. Исто така, изработувам и столчиња“, вели дедо Методи за „М Нет“.

Една од позначајните награди на дедо Методи му е од 1985 година, кога настапувал на фестивал во Прилеп.