Дали треба да останете во брак само заради децата?

Како и многу други општества, и Македонија доживеа зголемување на стапките на разводи. Промената на ставовите кон бракот, зајакнувањето на жените и развојот на општествените норми придонесоа за поголема инциденца на разводи. Од осамостојувањето на земјата речиси трипати е зголемен бројот на разводи.

Одлуката за развод не е лесно да се донесе, а некои избираат да останат во брак, дури и ако се незадоволни поради тоа, заради децата. Сепак, дали таквите деца се среќни? На Reddit имаше дискусија на оваа тема откако еден човек ја објави својата исповед. Поради друга жена размислува за развод, а повеќето му велеа дека треба да го спаси бракот заради заедничкото дете.

„Дали останувањето во брак од кој нема ништо, само за да живеат заедно мајката и таткото на детето иако и двајцата се несреќни, е подобро од разведени родители – секој си живее свој живот и учествува подеднакво во животот на детето“, праша тој по низа непријатни реакции.

Одговори понудија возрасни луѓе чии родители се развеле кога тие биле деца.

„Децата на разведени родители имаат добри шанси за ментално здравје, доколку родителите останат во нормална врска. Јас сум едно од тие деца“, коментира еден корисник.

„На детето му е подобро со двајца родители кои се среќни одвоени, отколку родители кои се заедно, а се несреќни.“

„Како дете од таков брак, можам само да препорачам да се разведете што е можно поскоро“, додаде друг.

„Дефинитивно ќе биде подобро за детето ако има двајца среќни одвоени родители, отколку несреќни заедно. На крајот на краиштата, детето ќе си замине еден ден, а вие ќе сфатите дека сте ги поминале најубавите години со личност која не ја сакате“, вели трет.

„Како дете од проблематичен брак, а воедно и причината зошто тој е воопшто склопен, посакувам да се разделеа барем дваесет години порано или никогаш да не се венчале. И да немаа уште две деца после мене (да се разбереме, ги сакам до небо и назад), што дополнително ја комплицираше работата секогаш кога беа на работ на разделба, тие секогаш остануваа заедно само поради нас децата. Главно ни останаа доживотни трауми од нивното (особено маминото, ултра токсично) однесување, од кое дел продолжува и денес, иако сите тројца живееме на различни адреси“, напиша четврто лице.

„Како дете зачнато во обид да се спаси бракот, не дозволувајте децата да страдаат ако не се согласувате“, вели петти корисник на платформата.

„Да се ​​остане во нефункционален брак заради децата е најлошото нешто што можете да им го направите. Децата можеби се деца, но не се глупави и многу брзо почнуваат да сфаќаат дека нешто не е во ред, без разлика колку родителите се обидуваат да го скријат тоа. Како дете на разведени родители, можам да кажам дека брат ми заработи трауми кои го следат до ден-денес затоа што видел и слушнал некои работи што не требало и тоа остави трага на него дури и во неговите 30-ти години. Кога сум имал 11 месеци, мајка ми ја донела најдобрата одлука што можела да ја донесе и се развела, на моја среќа, нејзина и на мојот брат. Денес ѝ сум благодарен што јас не поминувам низ она што поминал брат ми“, вели друг.

Се огласија и луѓе кои беа соочени со истата дилема како авторот на објавата.

„Како некој што излегол од брак во кој и двајцата бевме несреќни, искрено можам да кажам дека останувањето во каква било врска што ве прави несреќни е полошо за децата отколку да се разделите. Ќерка ми моментално има двајца родители кои не се караат пред неа. Ако затреба што било, двајцата сме тука за неа. Одлуките и понатаму ги носиме заедно, по договор“, објаснува една жена.

„Разведен сум, со бившата сум во коректна врска и мислам дека како родители одлично се сложуваме. Не сме пријатели, едноставно така е подобро и поздраво, но имаме еден вид пријателски однос. Не може да бидеш добар родител/татко ако не си подготвен да ѝ излезеш во пресрет на мајката на твоите деца за еден куп практични работи и ако трошиш пари себично на себе, а не на децата и домаќинството во кое живеат“, објаснува еден маж.

„Постарата ќерка добро прифати сè, имаше прашања, убаво објаснивме и толку, од мене слуша само убави работи за мама, а колку што гледам така е и од другата страна. Според мене, тоа е милион пати подобро отколку да слуша дека тато е идиот и мама е крава (за жал, целото мое детство го слушав тоа). Дали беше лесно? Не. Дали дадов огромни лични жртви за да биде сè добро? Да. Дали е стопати подобра одлука отколку да останеш во брак со некомпатибилна личност? Да. Дали беше огромен ризик? Да. Мислам дека ако двете страни не се подготвени да го стават егото на страна за добросостојбата на децата, тогаш нема да има среќа. Ама реално, треба да имаш и одредени приходи за да можеш да го финансираш разводот, тоа не е евтин спорт“, заклучи тој.