Српско-хрватско-италијанска банда ограбувала за Велигден: Упаднале во 15 станови, а секој од членовите имал своја улога

Во јужниот шпански град Малага уапсени се четири лица осомничени дека ограбиле или се обиделе да ограбат 15 станови. Тие припаѓаат на патувачка хрватско-српско-италијанска банда, соопшти денеска шпанската полиција.

За време на велигденските празници, кога многумина ги напуштаат своите станови, во Малага е забележана серија обиди за грабежи, при кои провалниците ги кршеле бравите.

За ова полицијата осомничила две жени и двајца мажи кои престојувале во хостел.

Жените ги кршеле бравите и влегувале во становите, додека мажите внимавале никој да не наиде на нив, соопшти полицијата.

Полицијата ги уапсила четирите неименувани лица во хостелот и кај нив пронашла алат за заклучување, накит, пари и парфеми за кои смета дека биле украдени.

Осомничените се изведени пред истражен судија.

Шпанија со години е на удар на банди, кои локалната полиција често ги нарекува „семејни кланови“, а чии членови имаат хрватски, српски и италијански документи.

„Постојано се селат од еден до друг дел на земјата и не се задржуваат никаде долго, што го отежнува нивното пронаоѓање и приведување“, велат од полицијата.

Водачот на бандата потоа го пренесува пленот во земјите од каде потекнуваат додава шпанската полиција.