Семејство од Сирија двапати останале без покрив над главата, еднаш поради гранати, вториот пат поради земјотрес

Силниот земјотрес што го потресе јужниот турски град Антакија на 6 февруари израмни цели станбени блокови и уништи илјадници животи. Меѓу нив е и живтот насемејството на Абдула ал Мохамед, пишува Ал Џазира.

Во 2020 година, сириско семејство било принудено да се пресели од нивниот роден град Сараќеб, поради конфликтот меѓу сириската влада и опозициските бунтовници.

Додека бомбите паѓале во близина на нивниот дом за време на офанзивата на владините сили на северозападна Сирија контролирана од опозицијата, Ал-Мохамед ја научил својата ќерка Салва, која тогаш имала три години, да игра игра што и помогнала да се ослободи од стравот.

Семејството на крајот се преселило во Антакија, Турција. Но, три години откако таткото и ќерката се оттргнале од несреќата со смеа, нивните животи во Турција повторно се уништија по низата земјотреси.

„Земјотресот беше толку силен, се обидов да стигнам до Салва од другата страна на собата, но ме турна наназад“, изјави Ал Мохамед за Ал Џазира.

„Се чувствувате како да сте заробени меѓу овој и задгробниот живот, се сеќавате на добрите работи и се насмевнувате, се сеќавате на лошите и барате прошка од Бога. Мислев дека земјата пука под нашите нозе, зградите се уриваат насекаде околу нас. Не знаев каде да трчам. Одвреме-навреме слушавме врисоци од урнатините и луѓето трчаа да помогнат“, продолжи тој.

Салва, откако го напуштиле објектот, почнала да плаче, како и многу луѓе кои трчале околу неа. Неколку часа подоцна, нејзиниот татко нашол автомобил во кој таа можела да се одмори и да се загрее.

„Беше смрзната, делумно од студ, делумно од страв, а одвреме-навреме повраќаше“, се присетува тој.

Семејството поднело барање за преселување во Канада пред повеќе од една година, но процедурата за преселување оди бавно. Ал-Мохамед се надева на нов дом каде неговото дете повторно ќе може да се смее.