Палестинскиот претседател назначи нов премиер

Палестинскиот претседател Махмуд Абас го назначи Мохамед Мустафа за премиер на Палестинската управа, објави денеска палестинската државна новинска агенција ВАФА. Назначувањето на Мустафа доаѓа по зголемениот притисок за реформирање на управното тело на окупираните палестински територии и подобрување на неговото владеење на окупираниот Западен Брег.

Новиот премиер е назначен да ја води хуманитарната помош и реконструкцијата на Појасот Газа, да ги реформира институциите на палестинската управа, додаде ВАФА. Мустафа е замена за премиерот Мохамед Штајах, кој поднесе оставка во февруари заедно со остатокот од владата.

Палестинската управа, во која доминираше политичката партија Фатах, имаше административна контрола над Газа до 2007 година, кога Хамас победи на општите избори во окупираните територии и ја протера од Појасот Газа. Оттогаш, Хамас владее со Газа, додека Палестинската управа владее со делови од Западниот Брег под израелска окупација.