Зеленски: Рускиот напад на Криви Рог покажува дека Москва не сака мир

Рускиот ракетен напад во кој денеска загинаа најмалку 14 лица во украинскиот град Криви Рог покажува дека Русија не сака прекин на огнот, изјави украинскиот претседател Володимир Зеленски.

„Секој ракетен напад и напад со беспилотно летало докажуваат дека Русија сака само војна. А само меѓународниот притисок врз Русија и сите можни напори за зајакнување на Украина, нашата воздушна одбрана и нашите вооружени сили ќе одредат кога ќе заврши војната“, напиша Зеленски во Телеграм.

Зеленски посочи дека Русија извршила напад со беспилотно летало врз термоцентрала во украинскиот град Херсон, обвинувајќи ја Москва за кршење на договорот за прекин на огнот со посредство на САД, објавија британските медиуми.

„Сите руски ветувања завршуваат со проектили, беспилотни летала, бомби или артилерија. За нив дипломатијата е празен збор“, рече тој.

Зеленски, исто така, рече дека денеска во Киев се сретнал со министрите за одбрана на Франција и Велика Британија за да разговараат за планот за распоредување странски контингент во Украина како дел од договорот за прекин на огнот и дека договор може да биде постигнат во рок од еден месец.

На прес-конференција во Киев, тој им рече на новинарите дека воените работни групи сега ќе се состануваат еднаш неделно за да разговараат за деталите од планот.