„Сан“: Документите на Пентагон откриваат дека Путин прима хемотерапија

Рускиот претседател Владимир Путин прима хемотерапија, а неговиот најтесен круг би можел да го искористи за заговор против него, се вели во „протечените“ документи на Пентагон, како што тврди британски „Сан“.

Според тие документи, информацијата за саботажа на Путин доаѓа од неидентификуван руски извор со пристап до внатрешните кругови на Кремљ.

Како организатори на наводниот заговор конкретно се споменуваат секретарот на Советот за национална безбедност на Русија, Николај Патрушев и началникот на рускиот Генералштаб Валериј Герасимов, наведува медиумот.

Порано имаше тврдења дека Путин боледува од рак на панкреасот и Паркинсонова болест во рана фаза. Во документот се наведува дека Николај Патрушев (71) од Советот за национална безбедност на Русија и Валериј Герасимов (67), началникот на Генералштабот на руските вооружени сили, планирале да го соборат Путин. Според документот, за да се ослабне Путин, руската инвазија на Украина морала да биде саботирана, преместувајќи ги војниците на јужниот фронт, стои во написите.

Планот, како што пишуваат медиумите, требаше да се имплементира на 5 март, а тогаш наводно била закажана хемотерапија, па на Путин би му оневозможило „влијание на воените напори“.

Доверливите документи на Пентагон почнаа да се појавуваат пред неколку недели, прво на платформата за разговор „Discord“, а подоцна и на „Telegram“ и „Twitter“.

Според медиумот, тајните документи очигледно биле испечатени и фотографирани. Покрај информациите за движењето на војниците и загубите во Украина, документите содржат и дневни разузнавачки извештаи.