Претседателот Иванов ќе додели признанија на организации и поединци од дијаспората

Денеска претседателот на Република Македонија, Ѓорге Иванов, во Музејот на македонската борба за државност и самостојност, во рамки на Четвртата годишна конференција на иселеничките организации ќе додели признанија и одликувања на девет македонски организации од дијаспората и 13 поединци – припадници на македонската дијаспора.

Претседателот Иванов ќе го додели признанието „Повелба на Република Македонија“ на Националниот совет на македонското национално малцинство во Република Србија, Македонското добротворно друштво „Македонија“, Македонското културно друштво „Св. Кирил и Методиј – Крањ“, Асоцијацијата на македонски друштва „Форум“, Организацијата „Обединета Македонска Дијаспора“, Организацијата „Обединети Македонци од Канада“, Македонскиот меѓународен комитет за човекови права, Австралиско – македонскиот комитет за човекови права и Македонскиот просветно – училиштен одбор за Нов Јужен Велс. 

Признанието „Повелба на Република Македонија“ се доделува за особени заслуги и достигнувања на организациите во насока на зачувување и афирмирање на македонските историски, културни и духовни традиции и вредности, како и за придонес кон унапредување на пријателските односи и соработка со повеќе држави во светот.

„Медалот за заслуги за Македонија“ се доделува на поединци – припадници на македонската дијаспора, за исклучителната посветеност и ангажираност во нивното работење и дејствување, со што значително придонесуваат кон афирмација на Република Македонија во светот.