Грција ја блокира Албанија на нејзиниот пат кон ЕУ поради билатерален спор

Грција одби да го поддржи писмото со кое се бара од Европската комисија да ги отвори првите пет поглавја од пристапните преговори со ЕУ.

Ова го изјави дипломатски извор за порталот „Еурактив“, со оценка дека на овој начин Атина врши притисок врз Тирана да покаже „креативност“ за да се реши тековната билатерална криза која настана во мај поради апсењето на етничкиот грчки кандидат за градоначалник Фреди Белери, кој се кандидираше под знамето на опозицијата, а кој беше обвинет за купување гласови.

Тој победи на изборите во Химара, јужна Албанија, но не можеше да положи заклетва како градоначалник поради апсењето и покрај апелите да му биде дозволено да положи заклетва.

Атина повеќе пати ја повикуваше Албанија да му дозволи да положи заклетва, нарекувајќи го тоа политички и етнички мотивирано апсење, додека албанската влада рече дека не може да се меша во судските постапки и дека судскиот систем мора да го следи својот тек.

Според изворот на порталот, Атина истакнува неколку прашања поврзани со владеењето на правото, како што е случајот Белери и спроведувањето на некои закони поврзани со албанското грчко малцинство, како што се имотните права.

Истиот извор истакна дека проблем има и во пописот што во моментов се спроведува, бидејќи се пријавени случаи каде на припадниците на грчкото малцинство не им биле поставувани прашања за религија или јазик.

„Атина не ја затвора вратата за пристапување во ЕУ, но има некои прашања што треба да се решат. Како што се работите веќе три недели, процесот не може да продолжи“, кажал изворот.