Грчките државни медиуми најавуаат победа на ВМРО-ДПМНЕ на изборите

Северна Македонија се движи во предизборен ритам во пресрет на претседателските избори, чиј прв круг ќе се одржи на 24 април, како и парламентарните избори кои ќе се одржат на 8 мај и ќе се совпаднат со вториот круг од претседателските избори, пишува грчката новинска агенција АНА-МПА, во текстот посветен на изборите кај нас, јави дописничката на МИА од Атина. 

АНА-МПА објаснува дека во текот на викендот, двете најголеми партии во земјата, „владејачката Социјалдемократска партија (СДСМ) и десничарската опозициска ВМРО-ДПМНЕ ги избраа своите претседателски кандидати“, но и дека поднесени се вкупно седум кандидатури.

Посочува дека кандидат на СДСМ повторно ќе биде актуелниот претседател Стево Пендаровски, на ВМРО-ДПМНЕ повторно ќе биде пратеничката Гордана Силјановска, а меѓу кандидатите се и министерот за надворешни работи Бујар Османи, „како кандидат на најголемата албанска партија и коалиционен партнер во Владата ДУИ, како и популарниот градоначалник на Куманово (втора по население општина во Северна Македонија), Максим Димитриевски“.

-Се смета за речиси сигурно дека кандидатката на ВМРО-ДПМНЕ Гордана Силијановска ќе влезе во вториот круг од претседателските избори со најверојатен противкандидат Стево Пендаровски, пишува грчката новинска агенција.

Во однос на парламентарните избори, АНА-МПА пишува дека „речиси според сите истражувања на јавното мислење ВМРО-ДПМНЕ е во предност пред владејачката СДСМ и тоа со голема разлика.

Текстот од државната новинска агенција го презедоа голем дел од онлајн изданијата на грчките медиуми.